Сітуацыя на валютным рынку на мінулым тыдні была неадназначнай. Так, даляр і расійскі рубель то таннелі, то даражэлі, а таргі еўра не праводзіліся. Фінансавыя аналітыкі прагназуюць, што будзе на валютным рынку найбліжэйшым часам.
Фінансавы аналітык Аляксандр Шкут звяртае ўвагу на тое, што ў апошнія месяцы назіралася зніжэнне курсу беларускага рубля да даляра і еўра, што звязана з пагаршэннем гандлёвага балансу, піша Office Life. Імпарт рос апераджальнымі тэмпамі ў параўнанні з экспартам, які знізіўся ў першую чаргу за кошт інфармацыйных тэхналогій. Адначасова фіксуецца аднаўленне беларускай эканомікі, што станоўча ўплывае на даходы насельніцтва. У выніку спажывецкі попыт расце і стымулюе павелічэнне імпарту.
— Яшчэ адзін фактар — захоўваецца высокая карэляцыя (узаемасувязь. — Заўв. рэд.) беларускага рубля з расійскім, які таксама істотна зніжаўся ў дачыненні да свабодна канвертаваных валют, — адзначае аналітык. — Але 21 ліпеня Банк Расіі падняў ключавую стаўку на 1%, адзначыўшы істотныя праінфляцыйныя чаканні і рызыкі. Расійскі рэгулятар сказаў, што ў выпадку рэалізацыі інфляцыйных рызык працягне рабіць больш жорсткай грашова-крэдытную палітыку, а гэта будзе садзейнічаць умацаванню курсу рубля. У выніку ў найбліжэйшыя месяцы мы ўбачым умацаванне і беларускага рубля ніжэй за тры за даляр.
Сусветныя рынкі чакаюць рашэнняў з ЗША і ЕС
На сусветным фінансавым рынку гэты тыдзень будзе адзначаны рашэннямі адразу двух ключавых рэгулятараў, адзначыў для Myfin.by фінансавы аналітык Міхаіл Грачоў. Так, у сераду, 26 ліпеня, чакаецца рашэнне Федэральнай рэзервовай сістэмы ЗША (аналаг Цэнтрабанка) па працэнтнай стаўцы (аналаг нашай стаўкі рэфінансавання). А на наступны дзень, 27 ліпеня, плануецца прыняцце рашэння па працэнтнай стаўцы з боку Еўрапейскага Цэнтрабанка. Гэта можа паўплываць на курсы даляра і еўра.
— Такім чынам, можна смела сцвярджаць, што гэты тыдзень будзе няпросты на ўнутраным і сусветным фінансавых рынках. Таму зрабіць дакладны прагноз досыць складана, — кажа Міхаіл Грачоў. — Але калі адштурхоўвацца ад таго, што расійскі рубель атрымае падтрымку, дапусцім усё ж, што на беларускім валютным рынку курс даляра ўшчыльную падыдзе да адзнакі 3 рублі з імавернасцю мінімальна знізіцца ніжэй за гэты курс. Не выключана, што ў канцы тыдня на фоне рашэнняў ФРС і ЕЦБ курс даляра можа вярнуцца да росту. Расійскі рубель у такім выпадку можа мінімальна вырасці ў кошце на беларускім валютным рынку.
Чытайце таксама
